काठमाडौ । अमेरिकाका विभिन्न राज्यमा आइडा आँधीसँगै आएको बाढीका कारण तीन जना नेपाली नागरिकसहित कम्तीमा ४६ जनाको मृत्यु भएको छ । अमेरिकास्थित युनाइटेड शेर्पा एसोसियसनका अनुसार न्युर्योकमा बाढीका कारण सोलुखुम्बु घर भएका एकै परिवारका तीन जनाको मृत्यु भएको हो ।

लुखुम्बु जिल्लाको दूधकुण्ड नगरपालिका वडा नम्बर ३ जुनबेसी स्थायी घर भएका आङगेलु लामा श्रीमती मिङ्मार शेर्पा र १९ महिने छोरा लोप्साङ लामाको मृत्यु भएको एसोसियसनले जनाएको छ ।

अमेरिकी सञ्चारमाध्यम सीएनएनका अनुसार न्युयोर्क र न्यु जर्सीमा भारी वर्षा भएको छ । न्युयोर्कमा मात्रै बाढीमा परी १४ जनाको मृत्यु भएको छ । त्यसमध्ये ११ जनाको बेसमेन्टमा डुबेर मृत्यु भएको अधिकारीहरूले जनाएका छन् ।

त्यसैगरी न्युजर्सीका गभर्नर फिल मर्फीका अनुसार राज्यमा बाढीका कारण २३ जनाको मृत्यु भएको छ । तीमध्ये अधिकांशको गाडी बाढीमा डुबेको पनि उनले जानकारी दिएका छन् । त्यस्तै पेन्सिल्भानियामा ५ जनाको मृत्यु भएको छ भने मेरिल्यान्ड र भर्जिनियामा समेत बाढीले ठूलो क्षति पुर्‍याएको बताइएको छ ।