काठमाडौं । असोज ४ गते
चीनबाट ४४ लाख भेरोसेल खोप आएपछि आजदेखि पुनः कोरोना विरुद्धको खोप अभियान सुरु हुने भएको छ। आजबाट केही जिल्लाहरुमा पहिलो मात्रा र काठमाडौंमा भेरोसेलको दोस्रोमात्रा खोप लगाइने स्वास्थ्य तथा जनसंख्या मन्त्रालयले जनाएको छ ।

काठमाडौंमा पहिलोमात्रा लगाएका २ लाख ४० हजार नागरिकलाई दोस्रो मात्राको खोप दिइने छ।यस्तै, काठमाडौँ, ललितपुर, भक्तपुर, मकवानपुर, रामेछाप, सर्लाही र अछामका ४० वर्ष माथिका खोप लगाउन बाँकी सबै नागरिक र १८ वर्षमाथिका खोप लगाउन छुटेका विद्यार्थीलाई खोप दिइने छ ।

मनाङ, मुस्ताङ र रुकुमपूर्व बाहेकका बाँकी जिल्लामा भने ३५ वर्षमाथिका खोप लगाउन बाँकी सबै नागरिक र १८ वर्षमाथिका खोप लगाउन छुटेका विद्यार्थीलाई खोप दिइने छ।स्वास्थ्य तथा जनसंख्या मन्त्रालयले आज देखि निरन्तर १९ दिनसम्म खोप अभियान चल्ने छ।

अहिले खोप लगाएका सम्पूर्णलाई कात्तिकको ४ गतेदेखि दोस्रो मात्राको खोप दिइने जनाएको छ।मन्त्रालयका अनुसार केही जिल्लामा १८ वर्ष माथिका सम्पूर्ण नागरिकलाई भेरोसेल खोप लगाइने छ।