काठमाडौं, चैत ६ गते । उपराष्ट्रपति पदमा निर्वाचित उपराष्ट्रपति रामसहाय प्रसाद यादवलाई बधाई दिँदै निवर्तमान उपराष्ट्रपति नन्दबहादुर पुनले कार्यकाल सफलताको शुभकामना व्यक्त गरेका छन् । पुनले आफ्नो कार्यकाल टुंगिँदै गर्दा पुनले आफ्नो कार्यकाल सफल र सुखद बनाउन सहयोग गर्ने सबैलाई धन्यवादसमेत व्यक्त गरेका हुन् । आगामी दिनमा देशको राष्ट्रियता, भौगोलिक अखण्डता, सार्वभौमिकता र समृद्धिका लागि निरन्तर लागिरहने उनले बताएका छन् ।

आज एक विज्ञप्ति जारी गर्दै पुनले दुई कार्यकाल गरी ७ वर्ष ५ महिना उपराष्ट्रपति पदमा रहँदा आफ्नोसँग सौहार्द र सहयोगात्मक सम्बन्ध रहेको उल्लेख गरेका छन् । संवैधानिक परिधिमा रहेर संविधानको रक्षा, पालन तथा राष्ट्रिय एकता र भौगोलिक अखण्डताका लागि इमानदारीपूर्वक काम गर्दै उपराष्ट्रपति पदको गरिमा बढाउने कोसिस गरेको बताएका छन् ।

उनले आफुलाई उपराष्ट्रपतिमा निर्वाचित गरेर कार्यकाल सफल बनाउन समेत सहयोग गर्ने राजनीतिक दलहरूप्रति धन्यवाद ज्ञापन गरेका छन् । कार्यकाल सफल र सुखद बनाउन पूर्ण सहयोग गर्ने नेपाल सरकारप्रति धन्यवाद व्यक्त गरेका छन् । उनले जारी गरेका विज्ञप्तिमा भनेका छन्, यस अवधिमा उपराष्ट्रपतिको कार्यालयमा रही कार्यसम्पादन गर्ने कर्मचारीहरू, निजी सचिवालयका सदस्यहरूलाई धन्यवाद दिन चाहन्छु । सुरक्षा प्रदान गर्ने नेपाली सेना, सुरक्षा समन्वय गर्ने नेपाल प्रहरी, सशस्त्र प्रहरी बल र राष्ट्रिय अनुसन्धान विभाग तथा सुरक्षा निकायका अधिकृत तथा सदस्यहरूलाई धन्यवाद दिन चाहन्छु । सञ्चार क्षेत्र, विभिन्न संघ संस्था र आम नेपाली दिदीबहिनी तथा दाजुभाइहरूमा सहयोग र सद्भावका लागि हृदयदेखि धन्यवाद छ ।’