चितवन–२ मा रवि लामिछाने विजयी भए पुन उपचुनाव हुन्छ–योगेश भट्टराई
वि.सं.२०८० वैशाख ३ आइतवार
काठमाडौं, वैशाख ३ गते । बैशाख १० गते हुने उपनिर्वाचनमा चितवन – २ मा रवि लामिछाने विजयी भए पुन उपचुनाव हुनसक्ने नेपाल कम्युनिष्ट पार्टी (एमाले) का सचिव योगेश भट्टराईले बताएका छन् । सचिव भट्टराईले गत निर्वाचनमा पनि रविले जानीजानी गल्ती गरेको बताउँदै समाजलाई नै ढाँटेको आरोप लगाएका छन् ।
चुनाव प्रचारप्रसार कार्यक्रमका लागि चितवन पुगेका सचिव भट्टराईले भने, ‘चितवन – २ मा विगतको जस्तो नतिजा आए फेरि दोस्रोपटक उपचुनाव हुन्छ । यहाँका जनतालाई दुःख दिने काम गर्नु हुँदैन’
रविले कानून उल्लङ्घन गरेकोले पुन उपनिर्वाचन गर्नुपरेको सचिव भट्टराईले बताएका छन् । अहिले उपनिर्वाचनमा पुन रवि उम्मेदवार बनेका छन् । त्यस्तै सत्ता गठबन्धनको तर्फबाट नेपाली कांग्रेसका जितनारायण श्रेष्ठ र नेकपा एमालेका रामप्रसाद न्यौपाने उम्मेदवार छन् ।
उनले चितवन – २ मा एकीकृत समाजवादी र माओवादीको आफ्नो उम्मेदवार नभएकाले एमालेका उम्मेदवारलाई मतदान गरेर कम्युनिष्ट एकता र सहकार्यको सुरुवात गर्न आग्रह गरेका छन् ।
प्रकाशित समय : ०५:५५ बजे
